Махсус операциядәгеләргә ярдәм җыючы Рүзәл Минһаҗев: «Котламагыз мине Яңа ел белән!»
Шагыйрь, махсус операциядәге егетләргә гуманитар ярдәм җыючы Мөслим егете Рүзәл Минһаҗев сторислары аша үзен Яңа ел белән котламауларын үтенгән.
«Котламагыз, кирәкми! Егетләр өчен дога гына кылыгыз. Котламагыз бәйрәм белән! Шәхсән минем өчен бу – бәйрәм түгел. Егетләр ут эчендә, канга батып ятканда…
Ул салютлар элек тә шулай күп шартлый идеме икән, хәзер генә күземә ташлана башладымы? Безнең егетләрнең 95 проценты штурмда, 70 проценты – хәбәрсез…
Котлаганчы, догада булсак иде… Салют шартлатканчы, аларга икмәк белән су җибәрсәк иде…
Күп нәрсәне аңлап бетерә алмыйбыз шул. Андагы тормыш белән мондагы тормыш – җир белән күк арасы. Күз алдына да китерә алмыйбыз, китерергә дә язмасын. Югалту өстендә югалту», – дигән шагыйрь.
