Махсус операция зонасында ашарга пешерүче укытучы: «Коймак пешергән көн бәйрәмгә тиң»
Башкортстанда Красная Башкирия урта мәктәбенең математика укытучысы булып эшләгән Хәмдия Әбделгазина махсус хәрби операция зонасында пешекче булып эшли. Бу хакта «Өмет» сайтында Гөлнара Күчәрбаева яза.
«40 ел буена балаларга белем биреп лаеклы ялга чыккач, математиклар телендә әйткәндә, тормышымны 180 градуска бордым. Моңа гаиләбездә килеп туган үзара аңлашылмаучанлык та тәэсир итте, мин Себергә вахтага чыгып киттем. Гомер буе мәктәп юлыннан гына атлап, дөньяга балаларча беркатлылык белән караган миңа тормыш чынбарлыгында ачылды, кыскасы, алсу күзлегемне тиз салдым.
Бер авылда туып-үскән, хәтта бер сыйныфта укыган кеше белән гаилә корып, 38 ел бәхетле тормышта яшәдем. Балалар үсеп таралышып беткәч, көннәрдән бер көнне икебез ике якка чыгып китәрбез, дип уйлаганым да булмады. Мин вахтада чакта тормыш иптәшем дә үз карарын кылып, махсус хәрби операциягә китәргә контракт төзегән. Бер-беребезнең кадерен аңлар өчен шундый сынаулар аша үтәргә кирәк булган, димәк.
Самат Самарада хәрби слаживаниеда булган чакта вахта арасындагы 3 ай ялымны янында үткәрдем. Аннан алар махсус хәрби операция зонасына кузгалды. Хушлашканда: «Мин күп уйлап тормам, кирәк булса, артыңнан ЛНРга да барып җитәрмен», – дидем. Шул сүзләрем Аллаһы Тәгаләнең: «Амин!» дип әйткән чагына туры килгән микән, Луганск Халык Республикасына килүемә 2 ай булып килә», – диде ул телефон аша.
Ул, ире янына барып кайтырга дип, 18 мартта юлга чыга. Бәлки калырмын, дигән уй белән документ, башка кирәк-ярагын ала. 25 мартта хәрби гарнизонга килеп җитә. Командир белән сөйләшә һәм шуннан инде ул калырга була. Ротада пешекчеләр җитми икән. Шулай итеп, кичәге укытучы бүген килеп казан артына баса.
«Кухняда берүзем генә түгелмен. Ярдәмчем Алексей бар. Ул Түбән Тагилдан. Икәүләп тырышабыз, хәрбиләргә төшкелеккә һәм кичкә җылы аш пешерәбез. Кухняда өләшәбез, блиндажга алып кайтып ашыйлар. Хәрби-ялан шартларында гадәттә консерваланган ризык әзерләү тәлап ителсә дә, хәрбиләрне өй ашлары белән дә сыйлыйсы килә. Кул астындагы ингредиентлардан гади генә тәмле ризыклар әзерләп бирәбез. Коймак, тәбикмәк пешергән көн бәйрәмгә тиң. Ураза бәйрәмендә сарык суйдырып, корбан ашы ашаттык. Мине монда «ротная мама» дип йөртәләр. «Декабристка» дип тә җибәрәләр. Үзебезнең башкорт егетләре исә «еңгәй» дип дәшә.
Ара-тирә тревогалар булып тора. Ул вакытта, бөтен эшләрне ташлап, блиндажда ятабыз. Догалар укыйм. Җирдә тынычлык кына булсын. Башка бернәрсә дә кирәкми», – ди Хәмдия апа.