Махсус операция башланганнан бирле Брянск өлкәсендә атышларда дүрт кеше һәлак булган
Махсус хәрби операция башланганнан бирле Брянск өлкәсе Украина ягыннан 272 тапкыр атышларга дучар булган. Халык арасында яраланган һәм һәлак булган кешеләр бар, диде өлкә губернаторы Россия Президенты уздырган киңәшмәдә. Бу хакта «Интерфакс» яза.
«Бу - артиллерия, миномет атышлары, авиаһөҗүмнәр. Шушы вакыт эчендә барлыгы 22 кеше яраланды, 4 кеше һәлак булды», – диде губернатор.
Ул атышларда 235 шәхси йортка зыян килгәнен, аларның 7се тулысынча җимерелүен әйтте.
Брянск өлкәсе 2022 елның февраль ахырыннан бирле даими атышларга дучар булып тора. Төбәктә террористик куркынычның югары ("сары") дәрәҗәсе гамәлдә.