Матбугат чаралары: Европада Путин белән Трамп сөйләшүен Россиянең җиңүе дип атыйлар

Европа түрәләре Россия Президенты Владимир Путинның АКШ Президенты Дональд Трамп белән сөйләшүен Россия өчен «зур җиңү» дип саный. «Financial Times» басмасы, Европа дипломатларына һәм рәсми затларына сылтама белән, шул хакта язган. Бу турыда РИА «Новости» хәбәр итте.

«Европадагы рәсми затлар белдергәнчә, кичә аларның телефоннан сөйләшүе – Россия лидеры өчен зур җиңү», – диелә материалда.

Зур дәрәҗәдәге Европа дипломаты фикеренчә, кичә Украина темасына сөйләшүдән соң, Трамп Киевка ярдәм итүдән «читләшергә» җыена. «Украинага ярдәм һәм финанслау, Россиягә басым ясау – хәзер болар барысы да безгә кала», – дип борчыла ул.

Владимир Путин һәм Дональд Трамп дүшәмбе көнне телефоннан сөйләште. Сөйләшү 2 сәгатьтән артык булган.

Путин белдергәнчә, Мәскәү Киев белән меморандум буенча эшләргә әзер. Анда утны туктату да кертелә.

Сөйләшүдән соң Трамп белдергәнчә, ул Россиягә каршы яңа санкцияләр кертми, чөнки Украинада конфликтны җайлауга өмет бар. Америка президенты белдергәнчә, ул Зеленскийга һәм кайсыбер лидерларга Владимир Путин белән сөйләшү нәтиҗәләре турында җиткергән. Шулай ук, ул Россия белән Украина арасында сөйләшүләрнең кичекмәстән башлануын билгеләп үткән.