Машинасыз башкорт шагыйрәсе туган ягына 340 километр юлны атка атланып кайтып йөри

Башкорт шагыйрәсе Тәнзилә Дәүләтбирдина Уфадан туган ягы Бөрьян районына кадәр булган 340 километрдан артык юлны атта кайтып-китеп йөри икән. Аны юлда Башкортстан блогерларының берсе – Миләүшә Шәйхелисламова очраткан. Атка атланып, асфальт юл кырыеннан баручы җайдак хатын-кызга исе киткән «Башкирская домохозяйка»ның.

«Бөрьян чигендә туктадык.  Бер апай атта китеп бара», – дип, камерасына төшерә башлый блогер тизрәк бу күренешне.

«Тәнзилә апаең була, Дәүләтбирдина. Шагыйрә», – дип таныштыра үзен хатын-кыз җайдак. 

Аларның сөйләшүләреннән аңлашылганча, танылган шагыйрә инде икенче көн юлда. Башкортстан башкаласы Уфадан Бөрьян районына кайтып барышы.

Тәнзилә Дәүләтбирдина, ат өстендә бер көн барганнан соң, Индиярдә туктап ял итеп чыккан. Аннары кабат юлга кузгалган.

«Бәләкәй чактан ук атта йөрим, машинам юк», – дип бүлешә башкорт шагыйрәсе.

«Менә шундый «суровый» башкорт хатын-кызлары бездә. Уфадан Бөрьянгә атта кайталар. Белмәсәгез, белеп куегыз», – дип, башкорт хатын-кызларын мактый блогер.