«Машина өстенә төшкән» - Чаллыда 16 катлы йорт түбәсеннән егылган ир-ат исән калган
Чаллыда 16 катлы йорт түбәсеннән егылган ир-ат исән калган, әмма комага киткән. Аны хастаханәгә билгесез кеше буларак китергәннәр, дип яза «Челнинские известия».
Ул кичә кич Чаллыда 58/28 йорт түбәсеннән егылган. Ул могҗиза белән исән калган. Егет тукталышта торган автомобиль түбәсенә килеп төшкән. Бу хәл егылу көчен киметкән булырга мөмкин.
Зыян күрүчене хастаханәгә озатканнар. «Челнинские известия» басмасына хәбәр итүләренчә, хәзерге вакытта ир-ат комада. Аның кем булуы һәм ничә яшьтә икәне турында әлегә төгәл мәгълүмат юк.