Машина төзәткәндә бер ир-атның күз алмасына металл кисәге кадалган
Табиблар бу кешенең күзен саклап калган.
Уфада яшәүче ир-ат машинасын төзәткәндә имгәнә. Аның күзенә металл кисәге кереп кадала. Бу турыда «Башинформ» хәбәр итте.
Ир-ат офтальмология ярдәме бүлмәсенә мөрәҗәгать итә. Аның бер күзе сукыраю куркынычы була. Табиблар ачыклаганча, аның күз алмасы эченә чит предмет кереп кадалган. Уфадагы 10 номерлы хастаханә табиблары шактый катлаулы операция ясаган.
«Травма үзенчәлекле иде. Ике чит предмет күз алмасында тора. Аларның берсе магнитлы металл кыйпылчыгы, икенчесе — керфек. Пациентка экстрен операция ясыйлар һәм чит предметларны алалар. Әгәр белгечләр ярдәм итмәсә, ир-ат гомергә сукыр булып калу ихтималы була», — дип сөйләгәннәр Башкортстан буенча Сәламәтлек саклау министрлыгында.
Хәзер пациент офтальмология бүлегендә хастаханәдә ята. Аның күз күремен тулысынча саклап калганнар.