Машина сатканда кемнәргә салым түләмәскә ярый?
Моның өчен васыятьнамә яки бүләк итү килешүе булырга тиеш.
Машина саткан очракта салым түлисе була. Юкса штраф салулары ихтимал. Тик машина белән сату-алу вакытында салым түләнми торган очраклар бар. Бу турыда «Прайм» агентлыгына Россиянең атказанган юристы Иван Соловьев сөйләгән.
«Әгәр хуҗа машинасын якын туганына — әнисенә, әтисенә, иренә, хатынына, балаларына, бабасына, әбисенә, оныкларына, энеләренә һәм сеңелләренә, абыйларына һәм апаларына бүләк итсә, салым түләү вазифасы барлыкка килми. Бу мирас калдыруга да кагыла. Ләкин әлеге факт документлар — васыятьнамә яки бүләк итү килешүе белән расланган булырга тиеш», — ди белгеч.
Машинаны сатып алгач өч ел узганнан соң, аны салым түләмичә сатып була инде. Кагыйдә буларак, машинага хуҗа булу срогы сатып алу килешүе төзегән датадан башлана, ди Соловьев.