Марсилә-Илфир Искәндәровлар гаиләсендә бала белән күңелсез хәл: «Әле шоктан айный алмыйм»

Алып баручы Марсилә һәм баянчы Илфир Искәндәровлар гаиләсендә бәйрәм алдыннан күңелсез хәл булган. Аларның яшь ярымлык уллары Радэль ике 10 сумлык акча йоткан. Төнге «маҗаралар» турында Марсилә үзенең сторисларында сөйләгән.

«Кичә күңелсез хәл булды. Аллаһка шөкер, бар да яхшы тәмамланды. Әле дә шоктан айный алмыйм.

Төн хастаханәдә үтте. Радэль күз алдыбызда 10 сумлык акча йотты. Уф, андый вакытта мин бигрәк йомшак икән, ярый әни өйдә булды.

Беренче рентгенны Сабада ясаттык. Йоттымы, юкмы – үзебез дә шикләндек. Йоткан булып чыкты. Махсус өеннән безнең өчен килгән, рентген ясаган апага рәхмәт әйтәсем килә. Хирургка да, әлбәттә.

Очтык Казанга. Республика клиник балалар хастаханәсендә табибны өеннән чакырттылар. Миллион рәхмәт аңа, бик тиз алды. Нәтиҗәдә Радэль ике 10 сумлык акча йоткан булып чыкты.

Беренче тапкыр хастаханәгә эләгүебез. Хастаханәләрдә медосмотр гына уза идек. Миңа бик шәп дәрес булды бу», – дип язган ул.