Маринадланган помидор рецепты

«Челнинские известия» сайты бик тәмле иттереп маринадланган помидор рецепты тәкъдим итте.

Банкага сыйган кадәр помидор алына.

• 1 кишер,
• 1 суган,
• 1 чәй кашыгын өеп тоз,
• ярты стакан шикәр комы,
• 4 аш кашыгы аш серкәсе,
• 1 керән яфрагы,
• 2-3 укроп зонтигы,
• 3 телем сарымсак,
• 2 данә лавр яфрагы кирәк.

Стерильләштерелгән банка төбенә укроп, керән яфрагын, боҗралап туралган суган, кишер, сарымсак телемнәрен салырга һәм помидор тутырырга. Помидорларны чәнечке белән тишкәләргә кирәк.

Банкага кайнар су салырга һәм 20 минут тотарга. Аннары суны кәстрүлгә бушатырга, тоз, шикәр комы, лавр яфрагы, аш серкәсе салырга һәм кайнатып чыгарырга. Тоз һәм шикәр комы эреп беткәнче болгатырга.

Кайнап торган тозлыкны банкага салырга һәм капкачын борып ябып куярга.