Марат Яруллин «Татарстан Рәисен» концертка чакырган. «Рөстәм Нургалиевич» нәрсә дигән?

Марат Яруллин үзенең «Пирамида»да узачак юбилей концертына бик шәп реклама төшергән. Шәп булмый хәле юк, роликта Татарстан Рәисе үзе «төшкән» бит.

Марат, концертына чакыру язган плакатны тотып, Кремль каршына килеп баса. Аны көндәгечә эш кабинетыннан фото төшереп, татарстанлыларга хәерле иртә теләргә җыенган Рөстәм Нургалиевич күреп ала.

Җырчы тиз арада кара машинага кереп югала да, шундый ук тизлектә Рәис каршына килеп баса.

Рөстәм Нургалиевич:

Синең нәрсә, эшең бетте что ли? Специально делаешь что ли такие вещи?

Марат:

Сезне концертка чакырасым килде.

Рөстәм Нургалиевич: 

Кайчан?

Марат: 

31 май.

Рөстәм Нургалиевич:

Кайда?

Марат:

«Пирамида»да.

Рөстәм Нургалиевич: 

Ничәдә?

Марат: 

Кичке 7дә.

Рөстәм Нургалиевич: 

Нәрсә җырлыйсың?

Марат: 

Миңа нишләргә, әйтегез, дуслар!

Егетләр хәлен аңлыймы кызлар?

Рөстәм Нургалиевич дәвам итә: 

Хисләрем минем сүрелде инде,

Килерме миңа яңадан язлар?

Это ты что ли поешь?

Әйе, әйе, мин җырлыйм, – ди каушавыннан үзен кая куярга белмәгән Марат.

Роликтагы Рөстәм Нургалиевич ролендә Маратның виртуаль дуслары алып баручы Айнур Сөләймановны таныган. Актерлык белеме булган Марат та үз ролен искиткеч оста башкара.

Әлеге рекламаны җырчының дуслары: «Гениально», «Шедевр», – дип бәяләгән. Дусты Данир Сабиров, Рөстәм Миңнеханов концертка килә калса, Маратка бер ярты бүләк итәргә вәгъдә иткән. «Килмәсә, син миңа бер ярты», –дигән ул.

Данир белән Маратның бу комментарийларын җырчы Салават Миңнеханов кына бер дә ошатмаган. «Данир, Марат! Нинди «ярты» сөйлисез сез? Монда балалар да утыра. Азрак тормозга басыгыз инде», – дип ачуланган ул сәхнәдәшләрен.