Марат Яруллин: «Минем бер тапкыр һәм мәңгелеккә өйләнәсем килә»

Бүген яңгырлы һава торышы, бу – кәефегезгә ничек тә булса тәэсир итәме?

Юк, яңгыр кәефемә берничек тә тәэсир итми, тик кояш булса, барыбер күңеллерәк инде. Шулай да, мондый яңгырлы һава торышының яшьләр әйткәнчә, үз «вайб»ы бар.

Җәегез ничек үтте, кайларда ял итеп кайттыгыз?

Җәй күзгә дә күренмәде. Һаман да эш, нәрсәдер артыннан куу. Һәр иртә-кич «акыллы» колонка Алисадан: «Урамда нинди һава торышы?» – дип сорыйм. Кичә бу колонка миңа: «Иртәгә көне буе яңгыр булачак, 16 градус», – диде. Минәйтәм, көз җитте инде.

Җәй көне алай әллә ничек ял итеп булмады да. Безнең, концерт турын тәмамлагач, шундый бер традиция бар – абый белән икәү ял итәргә барып кайту. Быел машинада берничә көнгә Дагыстан якларына барып килдек. Әле Таиландта да булдык, тик ял бары җитмәде кебек. Хәзер инде беркая да барып булмый, чөнки концерт сезонына әзерлек бара, сулыш алырга да вакыт юк.

Сезгә абыегыз белән бер төркемдә эшләү авыр түгелме?

Күп кеше, туганнар белән эшләү авыр, дип әйтә шул. Бәлки, шулайдыр. Тик безгә әти-әни дөрес тәрбия биргән, бергә эшләргә авыр түгел. Алай да, эш булгач, төрле көннәр була, кайвакыт эш буенча аңлашылмаучанлыклар да килеп чыккалый. Ә болай тормышта, Аллаһка шөкер, безнең мөнәсәбәтләребез бик әйбәт, күз тимәсен.

«Эстрадада «якын дус» дип әйтерлек кеше юк»

Бүгенге көндә сәхнәдә артистлар беренче планга шоу күрсәтүне куялар, ә җырлау икенче планга китә. Сез моның хакта нәрсә уйлыйсыз? Үзегез басымны җырлауга яисә шоу күрсәтүгә куясызмы?

Замана бит инде. Концертларга әзерләнгән чакта, һәр елны нинди дә булса яңалык кертергә тырышасың. Җырчылар хәзер беренче елны – 1 экран, икенче елга – 2, өченче елга 3 экран куялар, аннары сәхнә җитми башлый. Минем уйлавымча, моның бер начарлыгы да юк, чөнки халык йөрсә, димәк, аларга бу ошый. Минемчә, татар эстрадасы барлык яктан уңган булырга, артта калмаска, ә киресенчә, алга барырга тиеш. Үземнең проектымны җырлау, шоу күрсәтү, хореография, юмор һәм башка яклардан да камил итәргә, хәзерге заманга туры китерергә тырышам.

Бүгенге көндә сәхнәгә чыгып, гармунга җырлаучы бик аз. Ә кешегә һәрвакыт нинди дә булса яңалык, аларны кызыксындырырдай әйбер кирәк. Хәзер татар эстрадасындагы артист ул җырчы гына булырга тиеш түгел, ул бөтен яклап килергә тиеш. Шуңа күрә, минемчә, хәзер җырлап кына булмый. Җырчылар бик күп, ләкин алар шулай җырчы гына булып калалар да.

Эстрададан кемнәрне яратып тыңлыйсыз?

Эстрадада барысын да хөрмәт итәм, иҗатларын яратам. Мәсәлән, легендабыз Салават абый җырларында үстек, аны яратып тыңлыйм, яңа җырлары чыкканын көтәм. Ильмира Нәгыймова, Гүзәл Уразова, Ришат Төхвәтуллинны яратып тыңлыйм. Күп инде алар, без барыбыз да бер юнәлештә эшләгәч, коллегаларның иҗаты белән танышып бару кызык. Иҗатым белән дә шулай кызыксыналар дип өметләнәм (көлә).

Эстрадада «дус» дип әйтерлек кешеләрегез бармы?

Эстрадада мин барлык җырчылар белән диярлек элемтәдә. Тик эстрадада «якын дус» дип әйтерлек кеше юк.

«Артист кеше – ул бит робот түгел»

Сез бер сезонга ничә концерт куясыз?

Үткән елгы сезонда, банкетлардан кала, 85 концерт куелган.

Быелгы программагыз ничек аталачак?

«Кыланчык» дип аталачак. Ни өчен алай дигәндә, мине социаль челтәрдәге апалар «кыланчык» дип йөртәләр. Шуңа турны да шулай атарга булдык. Концертларымда «хейт», нигә мине кыланчык диюләре, минем чыннан да шундыймы икәнем турында сөйләшәчәкбез. Быелгы программа кызык, үзенчәлекле булачак, аны концертка килеп күрә алачаксыз.

Концертларда күп йөреп, сезнең сәламәтлегегез какшамыймы?

Төрле чак була инде. Артист кеше – ул бит робот түгел. Тавышсыз булганыбыз да, температура белән чыгып җырлаганыбыз да бар. Тамашачы безне тыңларга, ял итәргә килә, шуңа, авырып китсәк тә, бөтен көчебезне җыеп, чыгыш ясыйбыз инде.

Концертлар күп куеп арып, «выгорание» булганы юкмы?

«Выгорание» сүзе артык каты яңгырый. Мин «выгорание»ларга, деперссияләргә бирелергә тырышмыйм, аңа бирелергә ярамый да. Тик, уянгач, берни эшлисе килмәгән, көчең булмаган көннәр дә булгалый. Тормыш булгач, төрле чаклар була: кояшлы һәм яңгырлы көннәр булган кебек үк. «Депрессия» дигән чир бүгенге көндә киң таралган, андый көнгә калсаң – үзеңне кулга алырга, белгечләргә мөрәҗәгать итәргә кирәк. Депрессия һәм апатияләрдән иң әйбәт дару – ул һәрвакыт хәрәкәттә булу, спорт белән шөгыльләнү, җитәрлек йоклау, дөрес туклану, үзең сайлаган эшне яратып башкару, дусларың, туганнарың белән бергә вакыт үткәрү.

Танышларым арасында депрессиядән өчәр ел чыкмаганнары бар. Һәм ул кәеф булмаудан гына түгел, ул – чыннан да куркыныч чир.

Психологка мөрәҗәгать иткәнегез бармы?

Әйе, әлбәттә, бар. Бүгенге көндә дә, проблемаларым булса, психолог белән телефоннан да шалтыратып сөйләшеп алам.

Гадәттә, кеше психологка барса, аның турында «башы киткән» диләр. Ә без бит берәр җиребез авыртса, тиешле белгечләргә барабыз, киңәш сорыйбыз, дәваланабыз. Ә нишләп башта уйлар чуалган чакта психологка барырга ярамый?! Әгәр үзеңә ярдәм кирәк икәнне сизсәң, тизрәк белегчләргә барырга кирәк, чөнки бу проблемалар зурга китәргә мөмкин.

«Мин үземнең төркемем белән горурланам»

Хәзер җырчыларның төркемнәрендә яшьләр озак тормыйлар, сезнең дә төркемегездәге кешеләр еш алмашынып торамы?

Бездә быел беркем алышынмады. Инде 3 ел минем төркемем бары артып кына килә. Без 3 ел «Тамаша» продюсерлык үзәге – Зариповлар гаиләсе белән хезмәттәшлек иттек. Аларның гаиләсеннән Эмиль исемле егет безнең администратор иде. Быел без концертларны үзебез оештырырга булдык, һәм Эмиль безнең төркемебездән автомат рәвештә төшеп калды.

Ә болай, төркемдә глобаль үзгәрешләр юк. Биюче бер кызыбыз артты, һәм клавишада уйнаучы бер яшь кенә кыз өстәлде.

Хезмәт хакларын әйбәт түлисезме соң?

Әйбәт хезмәт хакы – ул бит төрле кеше өчен төрле саннар. Минем уйлавымча, төркемемдә хезмәт хаклары бик әйбәт. Безнең берәү дә аппаратураны җыештырмый, өстәмә нәрсәдер эшләмиләр. Төркемемдәге музыкантлар да, биючеләр дә – профессионаллар, шуңа аларга хезмәт хакын да тиешенчә түлим. Үземнең төркемем белән горурланам, быел да, Аллаһ боерса, барысы яхшы булыр, дип өметләнеп калам.

Сезне биючеләрегездән дә «харизматичныйрак», яхшырак хәрәкәтләнә, диләр, үзегез моның хакта нәрсә уйлыйсыз?

Белмим инде, халыкка әйбәтрәк аңлашыладыр. Сәхнәдәге үземне видеолардан гына карыйм, анда да әле тулы күренешкә күбрәк игътибар итәм.

«Миңа популярлык кинәт кенә килмәде»

Үзегезне «танылган артист» дип уйлыйсызмы?

Әйе. Танылмаган артист, дип әйтмим, чөнки таныйлар бит, фотога да төшәләр, автограф та сорыйлар. Камиллекнең чиге юк, диләр бит. Алда әле эшлисе эшләр күп.

«Йолдыз чире» белән авырганыгыз булдымы?

Юк, Аллаһка шөкер. Кирәге дә юк. Ни өчен авырмадым, дигәндә, миңа популярлык кинәт кенә килмәде, 2017 елда беренче альбомымны яздырдым, ә «сольный» концертларым белән мин 2022 елда гына йөри башладым. 2022 елда таный башласыннар өчен, 5-6 ел эшләдем.

Кайбер җырчылар бер җыр белән сәхнәгә «очып» керәләр дә, аннары шулай ук тиз «очып» та төшәләр. Русчалап әйткәндә, «больно падать» инде. Шуңа бу чир белән авырырга кирәкми.

Чыннан да сезнең җырларыгызның барысы да диярлек хит була, ничек сайлыйсыз сез аларны?

Җырларны үзем сайлыйм. Миндә ниндидер «чуйка» бар, җырның «демо версиясен» ишетсәм, аның хит булачагын аңлыйм.

Безнең тандем ул – мин, Айнур Сабирҗанов, Гөлфия Шакирова һәм аранжировка ясаучы Нияз Вәлиев. Күпчелек хит җырларымны Айнур язды, аңа «респект», «красавчик» ул. Әле күптән түгел Айнур Шәрәпов белән эшли башладык, аның кушаматы «Бүре», ул җырлар да яза, аранжировкалар да эшли. Ә болай, төрле авторлар белән эшлим, алар алышып тора. Беренче вакытта Фирзәр абый Мортазин, Гүзәлия белән дә эшләгән булды.

«Мәхәббәт – ул иң көчле хис»

Сез авылга кайтып яшәр идегезме?

Авылда рәхәт, анда кайтып яшәр идем, тик хәзер түгел, ә соңрак. Әлегә авылга әти-әни янына ешрак кайтып йөрергә тырышабыз.

Әгәр дә сезнең яраткан кешегез «иҗаттан кит» дисә, тыңлар идегезме?

Ул шулай әйтсә, ул минем яраткан кешем була алмый. Миңа шартлар куярга кирәкми. Иҗаттан үз теләгем белән китсәм генә, башкалар сүзе белән мин моны эшләмиячәкмен. Хәзерге көндә мин иҗат белән яшим, аңардан китүгә караганда, «кит» дип әйтүченең китүе җиңелрәк.

Миңа яраткан кешем шулай әйтсә, ул юләр хатын-кыз була. Ул беренче очып чыгачак (көлә).

Сезнең өчен мәхәббәт – нәрсә ул?

Мәхәббәт турында бер «мощный» шигырем бар минем.

Нәрсә ул мәхәббәт?

Мәхәббәт ул – нәрсә?

Мәхәббәт ул – мәхәббәт,

Ә нәрсә ул – нәрсә.

Мәхәббәт яраткан кешеңә, эшеңә, әти-әниеңә. Мәхәббәт – ул иң көчле хис, дип уйлыйм, нәрсә икәнен аңлатып та бетереп булмый.

Беренче мәхәббәтегез исегездәме?

Әйе инде, ул кемнең исендә булмасын.

Сагынасызмы соң аны?

Юк, ул да мине сагынмый, дип ышанып калам. Беренче мәхәббәт үзенчәлекле инде ул, аңа охшаган мәхәббәт юк та ул. Тик ул яшь чакта булган бит инде, ул – тормышның бер этабы гына. Үтте, бетте, китте, бүгенге белән яшәргә кирәк.

«Мине «отшивать» иткәннәре юк»

Сезнең фанаткаларыгыз да күптер инде?

Әйе, артып кына тора алар.

Тормыш иптәшегезне алар арасыннан сайлап алыр идегезме?

Кем белә, ә нишләп юк?

Ә, бәлки, ул сезнең белән популярлыгыгыз өчен генә булыр?

Кеше белән аралашканда белеп була бит инде аның ни теләгәнен. Аңа нәрсә кирәк икәнен, нәрсә белән кызыксынуын аңлап була.

Минем төрле фанаткаларым булганы бар. Арада үз-үзләренә безне бергә дип уйлап, әллә ниләр язып бетергәннәре дә булды. Диалогны ачасың да, «Ник миңа язмыйсың?» диючеләре дә бар, ә бактың исә, аларны белмим дә.

Сезне кызлар «отшивать» иткән бармы соң?

Мине? Юк, әлбәттә. Мине «отшивать» иткәннәре юк, хәлләреннән килми (көлә).

Булачак хатыныгызны нинди итеп күрәсез?

Хатын мине аңлый белергә тиеш. Беренчедән, ул миңа, «иҗаттан китәсең» дип әйтергә тиеш түгел. Минемчә, ул татар милләтеннән булырга, матур, акыллы, яхшы, мәрхәмәтле булырга һәм иң мөһиме – ул казылыкны тигез генә, нәзек кенә кисә белергә тиеш. Хатын-кыз нинди булырга тиешлеген үзе белергә тиеш.

Сез абьюзер түгелме?

Мин – арбузер (көлә). Юк инде, мин абьюзер түгел, мин «очень добрый и пушистый, нежный и ласковый мужчина в рассвете сил».

Сезнең сөйгән ярыгыз бармы?

Минем сөйгән ярым юк.

«Мәхәббәт яшькә карамый, ә хискә карый» дигән сүзләр белән килешәсезме?

Әйе, әлбәттә. Мәхәббәт бит ул, йөрәккә ничек кирәк икәнен кушып булмый. Танышларым арасында яшь аралары күп булган парлар күп, матур гына яшәп яталар. Эстрадада Ринат абый Рахматуллин бар, ул да яшь хатынга өйләнде.

Яңа альбомыгыздагы «Шомырт, сирень, алмагач» җыры кемгәдер багышланганмы?

Дөресен генә әйткәндә, беркемгә дә багышланмаган, ул җыр миңа ошады, һәм шуңа башкарам.

Ә гомумән, кемгәдер багышлап җырлар чыгарганыгыз бармы?

Иң беренче җырлар арасында андыйлар шактый иде. Хәзер исә, кайбер җырларым шулай ук кемгәдер багышланып башкарыла.

«Гаилә корырга, балалар үстерергә теләк бар»

30 яшендә өйләнмәгән егетләр я карьерист, я бик сайланып йөри торганнар, дигән фикер бар. Сез кайсысына керәсез?

Элекке заманга кайтсак, чыннан да бик иртә өйләнешкәннәр бит. Минем уйлавымча, өйләнү өчен иң әйбәт вакыт – 20 яшьтән 30га кадәр. Ә 30дан узгач, бәлки, авыррактыр инде. Ярар, 30да өйләнмәдең, 31дә дә өйләнмәдең, шуннан нәрсә була инде? Популяр җырчылар арасында да бар бит шундыйлар. Мисал өчен, Тимати, ул яраткан хатын-кызларының һәрберсе белән очраша, балалар ясый да, аннары акча белән ярдәм итә, тик ул бит өйләнмәгән, ул буйдак. Асаф абый күптән түгел генә өйләнде.

Үземне сайланып йөрим, дип тә, карьерист булганга өйләнмим, дип тә әйтә алмыйм. Бәлки, кеше теләмидер, аңа яраклы кеше юктыр. Гаилә институты бит ул катлаулы. Мисал өчен, хәзер бер көнне өйләнешәләр дә, икенче көнгә аерылалар. Минем бер тапкыр һәм мәңгелеккә өйләнәсем килә. Ничәдә өйләнсәм дә, Ходай ничек язган – шулай булыр. Гаилә корырга, балалар үстерергә теләк бар.

Әле күптән түгел әти-әниегезгә машина бүләк иттегез. Ничек кабул иттеләр?

Алар шок хәлендә калдылар, бик куандылар, әни елап та җибәрде. Әти-әнигә мең рәхмәт, озак кына яшәсеннәр. Аларның бергә яшәүләренә быел 45 ел, шушы датага бүләк ясарга булдык. Машина алып бирү – без алар өчен эшли ала торган әйбернең иң әзе. Минемчә, хәлдән килгәнчә әти-әнине шатландырырга, алар белән вакытны күбрәк бергә үткәрергә кирәк.

Кредит, ипотекаларыгыз бармы?

Ипотекам бар. Хәзер ипотека кемдә юк соң ул?! Без әллә нинди магнатлар түгел, шуңа ипотекабыз да бар.

Җылы әңгәмә өчен зур рәхмәт сезгә!