Марат Яруллин язылучыларын гаҗәпкә калдырган. Җырчы социаль челтәрләргә чәчен пеләшкә алдырган фотосын куйды.
«Ахырга кадәр барырга әзер булмасагыз, бәхәсләшмәгез. Мине яңа образ белән!» – дип яза ул. Әлбәттә инде, күпчелек «подписчик»лары фотоның 1 апрель көнне куелуын исәпкә алып, моның җырчы тарафыннан уйлап табылган бер мәзәк кенә булуына төшенгәннәр. Алар да комментарийлар аша берсеннән-берсе кызык җаваплар язып калдырганнар.
«Пеләш башны үбәргә рәхәт, авызга чәч керми», – дип язган аңа дусты Данир Сабиров.
«Үбәрсең тогда», – дип җавап кайтарган аңа Марат, берничә елмаюлы смайл куеп.
«Бет – куркыныч әйбер инде ул, сак бул, Марат», – шаярткан аны Данирның хатыны Миләүшә дә.
«Бәхәсләшмәскә иде. Мин үземнең җиңәчәгемдә шикләнмәдем дә», – дигән бер дусты.
«Пеләш ирләрне яратам»;
«Төшкә кермәсәң ярый инде. Так не шути»;
«Башыңда чебен таеп егылырлык»;
«Чын солдат булган бу малай»;
«Марат яхшы җырлап кына калмый, фотошоп белән дә эшли белә»;
«Шик, шок, шак! 1 апрель белән!» – дип язалар алар.
«Аллам, нәрсәгә?», «Бәтәч, нигә кирәк иде, Марат?» – дип ышанучылар, 1 апрель икәнне онытып җибәрүчеләр дә булган.
