Аранжировкалар ясаучы, композитор Марат Мухиннның хатыны, блогер Гөлия Вәлиәхмәтова иренә килешү төзергә тәкъдим иткән. Бу акыллы фикер Гөлиянең башына Дубайда, диңгез ярында кызынып яткан вакытта килгән.
«Марат бер ай эчендә 5 килограмм авырлык җыярга, ә мин, киресенчә, 5 килограммга ябыгырга тиеш. Әгәр Марат бу шартны үтәми икән, миңа 100 мең сум акча бирә, ябыга алмасам – мин бирәм. Миңа калса, бу бик шәп стимул. Әмма Маратның ризалашырга теләге юк», – дигән блогер.
«Чөнки мин ул авырлыкны җыя алмаячакмын. Шулай да, мин уйлап карармын», – дип сүз биргән Гөлиягә ире.
Гөлиянең бер виртуаль дусты: «Авырлыкны җыюга караганда ташлавы күпкә җиңелрәк бит. Марат 5 килограммны тәүлек буе ашап утырып та җыя алмаска мөмкин. Шуңа күрә 100 меңне инде үзегезнеке дип саный аласыз», – дип язып куйган, шаяртып.
«Мин бит май катламы турында сөйләмәдем. Мускулларын үстерсен. Мускул майга караганда авыррак. Күнегүләр ясасын», – дигән аңа каршы Гөлия.
