Марат Кәбиров авырый: «Телефоннар җавап бирмәскә мөмкин, ләкин мин исән»
Язучы инстаграм сәхифәсендә үзенең авырып китүе турында яза.
Язучы Мәрат Кәбиров, кислород маскасы белән яткан фотосын инстаграмга урнаштырып, авырып китүе турында хәбәр итә.
«Аерым-аерым җавап биреп арыдым, шуңа монда куям. Бөтен эшләр, очрашулар, концертлар, чыгышлар һәм башкалар билгесез вакытка кичектерелә. Мессенджерлар эндәшмәскә, телефоннар җавап бирмәскә мөмкин. Ләкин мин исән. Барлык нәтиҗәләре белән…» — дип язган ул инстаграмга.
Марат Кәбировның иҗатын сөюче инстаграм дуслары, каләмдәшләре үзләренең бу хәбәргә бик борчылуын белдереп, комментарийлар калдырган.
«Бар да әйбәт булыр, Марат! Сөенечле хәбәрләр көтәбез! Терел тизрәк!»;
«Аллаһыбыз ярдәменнән ташламасын. Тизрәк аякка басып, иркен сулап, илһамланып иҗат итәргә язсын. Бу чир белән паникага бирелергә ярамый, көчле булыгыз»;
«Зинһар өчен, бирешмә Марат! Савыга күр! Синең исән-имин булуың милләтебез өчен дә бик кирәк!";
«Аллаһы Тәгалә ярдәмен бирсен. Кымыз, томат согы, шулпа эч, яме», — киңәшләр дә биргәннәр.
