Марат-Артур дуэты “Бик сагынсаң” җырын башкара

"Бик сагынсаң"
Роберт Миңнуллин сүзләре
Ринат Гобәйдуллин көе

Бик сагынсаң әгәр мине
Зәп-зәңгәр күккә кара.
Син яшәгән якка таба
Аккошлар очып бара.

Тик, әйт әле мәхәббәтне
Аккошларга тиңме без?
Тиң икәнбез, аккош булсын
Безнең шартлы билгебез.

Әзләрсең син аккошларны
Сөюемне сакласаң.
Син кайгырма зәңгәр күктә
Аккошларны тапмасаң.

Аларның бит гомерләре
Зәңгәр күккә бәйләнгән.
Күпме аккошның гомере
Ак болытка әйләнгән.

Бик сагынсаң ак болытлар
Күренер аккош булып.
Ак мамыкларын кар итеп
Очыртыр аккош булып.

Кар бөртекләре алдыңда
Бөтерелеп йөрерләр.
Аннан күз яшләре булып
Керфегендә эрерләр.