Мамадышта бер өйдә янгында өч ир-ат үлгән
Янгын тәмәке тарту аркасында килеп чыккан дип фаразлыйлар.
Узган төндә Мамадыштагы шәхси йортта янгын чыга. Хәрабәләрне актарганда өч ир-ат мәете табыла. Аларда яну матдәләре белән агулану билгеләре була. Бу турыда «Татар-информ» хәбәр итте.
«Саксызлык аркасында үлемгә китерү» маддәсе буенча җинаять эше ачылган. Бу турыда Россия Тикшерү комитетының Татарстан буенча Тикшерү идарәсенең өлкән ярдәмчесе Андрей Шептицкий сөйләгән.
Янгын Дача урамындагы бер катлы ике фатирлы кирпеч йортта була. Урынга коткаручылар килгәндә өйдә диван һәм йокы бүлмәсендәге урын-җир яна. Янгынны сүндергәндә 33 яшьлек ике ир-ат һәм 35 яшьлек тагын бер ир-ат мәете табыла.
Якынча белешмә буенча, янгын тәмәке тартканда саксызлык аркасында килеп чыккан.
