Татарстанның Мамадыш районында «Лада» машинасы белән трактор бәрелешкән. Юл фаҗигасендә дүрт кеше һәлак булган.
ТР прокуратурасы хәбәр иткәнчә, юл-транспорт һәлакәте кичә 21:30 сәгатьтә Мамадыш-Кукмара-Ишки юлында булган. «Лада» йөртүчесе артык зур тизлек белән барган һәм алдындагы тагылмалы тракторга килеп бәрелгән. Җиңел машинаның йөртүчесе һәм өч пассажиры урында ук һәлак булган.
Россия Гадәттән тыш хәлләр министрлыгының ТР буенча Баш идарәсендә сөйләүләренчә, юл-транспорт һәлакәте урынына коткаручылар җәлеп ителгән.
Тикшерү үткәрелә, аның процессын прокуратура контрольдә тота.
Фото: © Россия Гадәттән тыш хәлләр министрлыгының ТР буенча Баш идарәсе