Башкортстанның Мәләвез районында Иштуган авылы янындагы карьерда су коенганда әтисе һәм 4 яшьлек улы батып үлгән. Бу турыда «Башинформ» хәбәр итте.
Якынча белешмә буенча, 37 яшьлек ир-ат дуслары белән су буенда хәмер эчеп утыра. Башта шаһитлар бала батуы турында коткаручыларга хәбәр итә.
«Баланың ничек суга керүе һәм бәхетсезлек очрагы ни сәбәпле килеп чыкканы билгесез. Шунысы аермачык, баланы өлкәннәр карап тормаган. Урынга коткаручылар килгәч, батып үлгән әти кешенең дә мәетен тапты», – дип сөйләгәннәр экстрен хезмәттә.
Коткаручылар бары җиһазландырылган урында гына су коенырга яравын искәртә. Шулай ук исерек килеш коенырга, ярдан ерак китәргә, иң мөһиме – балаларны ялгыз калдырырга ярамавын әйтәләр.