«McDonald's» компаниясе Роспатентка үзенең «Макдоналдс» товар билгесен теркәүгә гариза биргән һәм хәзерге вакытта ведомство белән элемтәдә тора, дип яза РИА «Новости».
Ведомство мәгълүматлары буенча, компания теркәлүгә гаризаны 2024 елның декабрендә биргән, Роспатент аны 2025 елда бастырган, апрельдә гаризаны карауга кабул итү турында карар кабул ителгән, компания шулай ук товарлар һәм хезмәтләр исемлегенең кодекс таләпләренә туры килүе турында хат җибәргән.
«Макдоналдс» товар билгесе астында компания Россиядә эчемлекләр һәм ашамлыклар әзерләргә, ресторан хезмәтләре күрсәтергә һәм ашамлыклар, эчемлекләр доставкасы ясарга тели.
«Хәзер гариза белдерелгән билгеләмә экспертиза стадиясендә. Теркәлүгә шанслар, һичшиксез, югары, чөнки компания Россиядә «McDonald's»ның барлык төп брендларына хокукларын саклап калган», – дип сөйләгән РИА «Новости»га «Онлайн Патент» компаниясе генераль директоры Алина Акиншина.
Рус телендә гариза бирү компаниянең Россия кануннарына буйсынып, элмә такталарны рус телендә урнаштыруга таләпләрне үтәргә әзер булуы турында сөйли.
«Мондый позиция «Макдоналдс»ның Россия базарына кайтуда потенциаль кызыксынуын раслый», – дип әйткән эксперт.