Махсус костюм кигән табиблар качкын авыруны куып йөргәнен видеога төшергәннәр
Ир-ат коронавируска анализларны көтеп ятмыйча, качып китәргә уйлаган.
8 апрельдә Арзамас шәһәрендә ашыгыч ярдәм фельдшерлары бер авыруның артыннан куып йөри. Табиблар махсус костюм кигән. Психик авыру ир-ат исә ашыгыч ярдәм машина утырудан баш тарткан һәм качып киткән. Бу хәлне шаһитлар видеога төшереп алган. «Вести» каналы шул кадрларны күрсәтте.
Видео социаль челтәрләрдә таралгач, шәһәр халкы куркуга калган. Коронавирус белән авырый торган кеше качкан булган дигән имеш-мимешләр барлыкка килгән. Шуннан соң Арзамас мэры Александр Щелоков халыкка мөрәҗәгать иткән. Аның сүзләренчә, бу кешедә COVID-19 әлегә расланмаган, тест нәтиҗәләре атна азагында гына билгеле булачак.
Шәһәр башлыгы сүзләренчә, психик авыру ир-ат әнисе белән яши. Ләкин аны хастаханәгә операциягә салганнар. Бу ир-ат артыннан карарга кеше калмаган. Аны психоневрология интернатына озатырга карар кылганнар. Башта коронавируска анализ тапшыру таләп ителгән. Ир-ат исә анализ нәтиҗәләрен көтеп ятмаска һәм качып китәргә карар кыла. Аны табиблар тоткан һәм карантинга япкан, диелә хәбәрдә.