Мәгариф министры Сергей Кравцов сүзләренчә, РФ Мәгариф министрлыгы педагогларны MAX илкүләм мессенджерына мәҗбүриләп күчермәячәк. Мәгариф системасы үзе аңа мөмкин кадәр тиз арада күчеп бетәчәк, чөнки платформа уңайлы һәм куркынычсыз, дип саный Сергей Кравцов. Бу хакта РИА Новости хәбәр итә.
«Минемчә, яңа мессенджерга мәҗбүриләп күчерергә кирәкми. Әмма интерфейс бик уңайлы, аңлаешлы, һәм, иң мөһиме, мәгълүматлар яхшы саклана», – ди министр.
Кравцов өстәп әйткәнчә, ата-аналар һәм педагоглар илкүләм мессенджерның өстенлекләрен аңларга тиеш.
«Укытучылар һәм ата-аналар моны яхшы аңлый, дип уйлыйм. Мәгариф системасы тиз арада яңа мессенджерга күчеп бетәчәк», – дип саный РФ Мәгариф министрлыгы башлыгы.