«Мәетне ярып алу өчен крокодилны аттылар» – Елгада йөзүче футболчыны крокодил ашаган

Коста-Рикада крокодил футболчы ир-атны ашаган. Бу турыда матбугат чараларына сылтама белән РИА Новости яза.

«Депортиво Рио Каньяс» клубы футболчысы Хесус Альберто Лопес Ортисның фаҗигале үлеме турында The Sun басмасы хәбәр иткән.

Фаҗига шимбә көнне була. Гуанкасте провинциясендә Каньяс елгасында йөзгәндә, Ортиска крокодил һөҗүм итә. Аннары крокодилны полиция хезмәткәрләре атып үтерә. Чәршәмбе көнне футболчыны җирләгәннәр.

«Безнең өчен бик авыр көн. Без сине футболчы, тренер һәм әти буларак истә тотарбыз. Син безнең йөрәкләрдә мәңге яшәрсең», – диелгән клубның хәбәрендә.

Лопес Ортиска 29 яшь, аның 2 баласы ятим калган.

«Вести» каналы белешмәсе буенча, мәрхүмнең мәетен ярып алу өчен крокодилны атарга туры килгән.