26 августта кич белән югалган 23 яшьлек хатынның мәетен урманда тапканнар. Татьяна исемле хатынның нәни баласы ятим калган. Бу турыда РЕН ТВ хәбәр итте.
Татьянаның мәетендә көч кулланып үтерү билгеләре ачыкланган. Төбәк буенча Тикшерү идарәсе җинаять эше ачкан.
«Хатын-кызның хәбәрсез югалуы турында билгеле булгач, оператив эзләү эшләре башланды. 28 августта кич белән урманда мәете табылды, анда көч кулланып үтерү билгеләре ачыкланды», – диелә ведомство хәбәрендә.
Социаль челтәр кулланучылар хәбәр иткәнчә, мәрхүмә 26 августта кичен югала, соңгы тапкыр аны бар янында очратканнар.
Татьянаның биредә медицина көллиятен тәмамлавы һәм шәфкать туташы булып эшләве билгеле. Бер ел элек ул кыз бала тапкан.
Тикшерү эшләре бара, диелә хәбәрдә.
