Мөслимдә бензин мичкәсе шартлап, бер ир-ат һәлак булган

Мөслим районы үзәгенең Кооператив урамында бер ир-ат һәлак булган. Ул бензиннан бушаган мичкәне эретеп ябыштыру эшләрен башкарган. Шул чакта шартлау булган һәм ир-ат үлгән. Бу турыда Россия Гадәттән тыш хәлләр министрлыгының Татарстан буенча Баш идарәсе матбугат хезмәтенә сылтама белән "Татар-информ" хәбәр итте.

"Бүген көндез 112 бердәм номерына шалтырату килде. Кооператив урамында авыл хуҗалыгы предприятиесе янында шартлау булган. Имгәнүчеләр бар, дип әйттеләр", - дип сөйләгәннәр Гадәттән тыш хәлләр министрлыгында.

Урынга барган коткаручылар егерме кубометр күләмле бензин мичкәсе шартлавын ачыклаган. Мичкә "Камаз" арбасына куелган була. Бер ир-ат шул мичкәне эретеп ябыштырып маташа. Шул чакта мичкә шартлый. Янгын чыкмый.

Әлеге фаҗигадә эретеп ябыштыручы 29 яшьлек  ир-ат һәлак була. Йөк машинасын йөртүче ир-ат пешә. Аны Мөслим Үзәк район хастаханәсенә китергәннәр.