Мөслимәләргә каш буярга ярыймы?
Бүгенге көндә дин тотучы кызлар арасында да каш ясау, керфекләрне махсус «үстерү» очракларын күрергә мөмкин. Шәригать әлеге мәсьәләгә ничек карый, мөслимәләргә артык «матурлану» рәхсәт ителәме?
Танылган ислам галиме, Коръән-хафиз Сухайл Тармөхәммәд үзенең «Заманча фәтвалар» китабында әлеге сорауга түбәндәгечә җавап бирә:
«Мөслимәләргә чәч төсләрен башка төскә буярга рөхсәт ителә. Әмма, әгәр чәч төсең ачык икән, аны кап-карага яисә артык ясалма төсләргә (зәңгәр, яшел, шәмәхә, кызгылт һ.б.) кертергә ярамый. Мондый чәч төсләре хатын-кызны әхлаксыз, җилбәзәк итеп күрсәтә. Чәчләрне табигый төсләргә буяу тыелмый.
Кашларны да буярга рөхсәт ителә. Бу очракта шулай ук артык күзгә бәрелеп тормаска, табигый төсләр сайланырга тиеш».