"Мәхәббәт - FM" спектаклендә Зәйнәп булып уйнаган Гөлчәчәк Хәмәдинурова-Гәрәева кыз тапкан!
Г.Камал исемендәге Татар дәүләт академия театры актрисасы Гөлчәчәк Гәрәеваның кызы туган! Бу хакта театрның Инстаграмдагы аккаунты хәбәр итте.
"Дуслар, шатлыклы хәбәр! Рамил һәм Гөлчәчәк Гәрәевлар гаиләсендә кыз туды! Рамил белән Гөлчәчәкне чын күңелдән котлыйбыз!
Кызыгыз сәламәт, бәхетле, акыллы, тәүфыйклы булып үссен! Рамил белән Гөлчәчәккә гаилә бәхете, имин тормыш, нарасыйларын тәрбияләүдә сабырлык, бары тик рәхәт мәшәкатьләр, куаныч-сөенечләр телибез!" - дип язылган Камал театры аккаунтында. Гөлчәчәк Гәрәеваны түбәндәге рольләрдә күрергә мөмкин: Зөлсәгыйдә – “Кыю кызлар” (Т.Гыйззәт); Зифа – “Арбалы хатыннар” (З.Зәйнуллин); Виолетта – “Бәби”, Нурзилә – “Әрем исе”, Зәйнәп – “Мәхәббәт FM”, Әминә – “Көтәм сине...”, Әби, Су анасы – “Кәҗә, сарык һ.б” (И.Зәйниев); Нәлимә – “Мулла” (Т.Миңнуллин); Дус кызы, яшь чагында – “Җәйнең бер көнендә” (Й.Фоссе); Шүрәлинә – “Җанкисәккәем” (Т.Миңнуллин); Рөкыя, Рауза – “Җилкәнсезләр” (К.Тинчурин) һ.б.