Мөфти Казан мәктәбе һәм Пермь университетындагы атышны ассимиляция нәтиҗәсе дип атады
Камил хәзрәт Сәмигуллин «Казан һәм Пермь атучылары» феноменына карата фикере белән уртаклашты.
Татарстан мөфтие Камил хәзрәт Сәмигуллин Казанның 175нче гимназиясе һәм Пермь университетындагы фаҗигане ассимиляция һәм тамырлардан аерылу нәтиҗәсе дип саный.
«Рухсызлык, милли һәм дини тәңгәллекне югалту, гаиләдән, үз тамырларыңнан һәм гореф-гадәтләреңнән аерылу Казанның 175нче мәктәбендә һәм Пермь университетында булган фаҗигаләргә китерә.
Шуңа бәйле рәвештә, бүгенге конференциядә фикер алышу ислам югары уку йортлары ректорлары белән генә түгел, православие динендәгеләр һәм, әлбәттә, дәүләт хакимияте вәкилләренә дә файдалы булыр, дип ышанам», — диде мөфти «Хәзерге Россиянең фәнни-мәгариф киңлегендә традицион диннәр теологиясе» II Халыкара фәнни-гамәли конференциясе пленар утырышында.
Аның фикеренчә, Үз мәдәниятеннән мәхрүм калган кеше әйләнә-тирәне юкка чыгару юлына баса.
«Казан һәм Пермь атучылары» феномены нәрсә ул? Бу — ассимиляция нәтиҗәсе. Кеше милли һәм дини үзаңнан башка тулы канлы шәхес буларак формалаша алмый. Туган мәдәниятеннән мәхрүм калгач, ул явыз булып үсә, бер чиктән икенче чиккә бәргәләнә. Нәтиҗәдә, үзен беркем дә түгел дип хис итә башлый, үз-үзен һәм әйләнә-тирәне юкка чыгару юлына баса», — диде Камил Сәмигуллин.
Ул шулай ук республикада мөселман белем бирү оешмаларында милли үзаңны үстерү мәсьәләләренә аерым игътибар бирелүен әйтте
«Менә ни өчен Татарстанның мөселманнар өчен белем бирү учреждениеләрендә мөселманнарның милли һәм гражданлык тәңгәллеге мәсьәләләренә аерым игътибар бирелә.
Татарстан территориясендә сигез мәдрәсәнең бишендә укыту татар телендә алып барыла. Шәкертләр арасында милли үзаңны ныгыту буенча дәрестән тыш тәрбия эшләре уза. Гражданлык тәңгәллеге һәм милли үзаң — аерылгысыз ике төшенчә», — диде Татарстан мөселманнары Диния нәзарәте рәисе Камил хәзрәт Сәмигуллин.