Казан янында М-7 трассасында 76 яшьлек хатын-кыз идарә иткән Kia Picanto каршы як полосадан йөргән. Әлеге кадрлар сурәтләнгән видеоны Казан Дәүләт автоинспекциясе социаль челтәрләрдә урнаштырды.
Хокук бозу 19 августта 11:30 сәгатьтә М-7 трассасының 832нче километрында видеокүзәтү камерасы ярдәмендә теркәлгән.
ЮХИДИ хезмәткәрләре автомобиль белән идарә иткән кешенең кем икәнен ачыклаган. Руль артында 76 яшьлек хатын-кыз булган.
Пенсионер хатынны ЮХИДИ бүлегенә чакыртып, аның белән профилактик әңгәмә үткәргәннәр. Шоферга карата административ беркетмә төзелгән, дип яза «Татар-информ».