Люция Ганиуллинага ураза турында постлар ошамый: «Бәдрәфкә йөргәнне дә күрсәтик!»
Биюченең бу постына бер генә каршы язучы да булмаган.
«Кызлы йорт» вәкилләре - Ганиуллиналарның берсе, биюче Люция Ганиуллина-Кузьмина уразага бәйле постларны ошатмавын язган.
«Изге Рамазан ае башланды. Инстаграмда башланды: бөтенесе яулыктан, без нинди әйбәт, безнең ифтарны карагыз, без дога кылабыз, карагыз мин мәчеттә, менә мин сәдака бирәм!
Але, кешеләр? Нигә сез моны күрсәтеп эшлисез? Минемчә, бу синең шәхси эшең, син аны үзең өчен эшлисең. Без бәләкәй чакта бабайлар һәм әбиләрнең намаз укыганын да күрмәдек, чөнки алар күрсәтеп эшләмәде. Хәзер нигә барыгыз да күрсәтеп эшли? Әллә мин хаклы түгелме? Шулай булырга тиешме? Ләкин алай булса, әйдәгез, бәдрәфкә йөргәнне дә күрсәтик!» — дип язган ул.
Люциянең бу постына бер генә каршы фикер язучы да булмаган.
«Рамазан ае башланды дип, яулыктан төшкән фотоларны кертә башлыйлар, модасы шундый микән? Иң мөһиме күңелдә булганы».
«Ел буе эчеп, тартып йөриләр дә, бер ай тәти булып кыланалар. Кылган гөнаһлары шулай бетәр дип уйлыйлар ахыры».
«Башта кешеләр шашлыкта дуңгыз ашап, сыра эчкәнен куя, аннары бәйрәм башлангач, шул темага фото куя. Мин үземне гөнаһлы хис итә башлыйм. Алар эшли, миңа оят».
«Бу бит шәхси әйбер. Әйдәгез, тәһарәт алганны да куегыз».
«Ай буе ифтарга нәрсә әзерләгәннәрен кертү башлана».
«Кем чын күңеле белән эшли, ул аны күрсәтеп эшләми. Дин күңелдә булырга тиеш».
«Син бигрәк кыю.Күпләр өчен Иман ритуалга әйләнде. Мәҗүсилектән күп әйбер. Чатларда открытка атып утыралар. Башта иманыгызны күрсәтегез».
«Кешеләр үзләренә ничек игътибар җәлеп итәргә белми».
«Махсус эшләнгән әйбер үзеннән этәрә. Күрсәтергә куелган сафлык фахишәлектән яман дигән әйтем бар».
«Безнең әбиләр хәзерге әбиләр сыман өйдән өйгә ләчтит сатып йөрмәделәр, буш вакытлары юк иде».