Әлшәй районында коточкыч юл һәлакәтендә дүрт кеше үлгән
«ВАЗ-2114» һәм «Рено Логан» машиналары кара-каршы бәрелешә.
4 октябрьдә Башкортстанның Әлшәй районында авариядә дүрт кеше һәлак булган. Бу турыда «Башинформ» хәбәр итте.
Башкортстан буенча ЮХИДИ хәбәр иткәнчә, Раевка-Ташлы юлның 7 нче километрында «ВАЗ-2114» һәм «Рено Логан» машиналары бәрелешә.
«ВАЗ» белән биредә яшәүче 40 яшьлек ир-ат, «Рено Логан» белән 63 яшьлек ир-ат идарә итә. Машиналар кара-каршы бәрелешә.
«Комсомольская правда» белешмәсе буенча, авариядән соң «ВАЗ» йөртүчесе, аның 48 яшьлек пассажиры, «Рено Логан» автомобилендәге 79 яшьлек пассажир хатын-кыз ашыгыч ярдәм килгәнче үк үлә. «Рено Логан» машинасындагы 68 яшьлек пассажир хатын-кызны хастаханәгә илтәләр, тик табиблар аның гомерен саклап кала алмый. «Рено Логан» йөртүчесе табиблар ярдәменнән баш тарта, диелә хәбәрдә.