Әлмәттә үсмер малай анасын суеп үтергән һәм мәет янында ике атна яшәгән
Әни кеше малаен өйдән чыгармаган, бала мәктәпкә дә йөрмәгән, мәктәптә уңышлы укый дигән ялган документларны директор язып биргән.
2020 елның ноябрендә Әлмәттә әнисен үтергән 13 яшьлек үсмергә карата тикшерү эшләре төгәлләнгән. Тиешле инстанцияләр әлеге гаилә турында оныткан һәм менә нәкъ шушы фактор фаҗигагә китергән. Тикшерү шундый нәтиҗәләр ясаган. Бу турыда «Татарстан 24» каналы хәбәр итте.
Былтыр Әлмәттәге фатирларның берсендә 36 яшьлек хатын мәете табыла. Аның муены киселгән. Биредә үк мәрхүмә хатынның 13 яшьлек улы да була, ул үзенә ашарга хәстәрләп йөри. Малай әнисен ике атна элек үтерүен әйтә. Шуннан бирле ул анасының мәете янында яшәвен дәвам итә.
Күршеләре сүзләренчә, мәет табылган чакта малай бәрәңге пешереп йөри, тыныч була.
Телеканал хәбәр иткәнчә, әни кеше улын өйдән чыгармый, баланың хәтта җылы киемнәре дә булмый. Балалар бакчасыннан соң, малай мәктәпкә дә йөрми. Бала мәктәп программасын уңышлы үзләштереп бара дигән ялган документларны исә белем бирү оешмаларының берсенең директоры язып бирә.
Хәзер малайны катлаулы үсмерләр өчен махсус оешмага җибәрү турында карар кабул ителгән, диелә хәбәрдә.