Әлмәт районы авылларында этләр азанга кушылып улый - видео
Азанга кушылган этләрне блогер Фәгыйлә Шакирова яздырып алган.
Фәгыйлә Шакированың YouTube каналында Әлмәт районының Түбән Абдул, Елховой авылларында яздырылган видеосы пәйда булды.
Видеодан күренгәнчә, авыл мәчетендә азан әйтелгәндә, этләр азанга кушылып улый башлый. Бу авыллар бер-берсе белән янәшә урнашкан, биредә биш мәчет бар. Азанга авылның бөтен этләре кушыла.
«Этләр биш вакыт намазны калдырмый», «Азан әйткәндә шайтаннар кача, аларны этләр күрә ахрысы», — дип сөйли авыл халкы.
Мәчет картлары аңлатканча, авылдагы «Тәүбә» мәчете гражданнар сугышына кадәр төзелгән. 1985 елда мәчетнең манарасы ауган. «Тып-тыныч көн иде, манараны кисмәделәр дә, ул үзе ауды», — дип искә ала авыл халкы.
