Әлмәт блогерлары битлек турында видео төшергән
Айназ белән Айдар Габидуллиннар кызыклы видеолар белән танылды.
Әлмәт блогерлары, ирле-хатынлы Айназ белән Айдар Габидуллиннар битлек турында видео төшергән.
«Битлекне ничәне сатып алсаң да, әллә кая югалып бетә. Сезнең дә шулаймы?» — дип язган Айдар.
Чыннан да, кибеткә керергә җыенасың, битлекне кесәләрдән, сумкадан эзләп интегәсең. Алар хатын-кыз сумкасында нәрсәләр генә булмавын күрсәтә, ә ирләрнең машина бардачогында шундый «тәртипсезлек» хөкем сөрә.
Айназ битлек эзләп, бөтен сумкасын бушата. Ә анда нәрсә генә юк?! Акча янчыгы, крем, ачкыч, чәч киптерү өчен фен, туфли, банан, он, аш чүмече, бала уенчыгы, хәтта чын мәче дә шунда була, ә битлек — юк.
«Матурым, синең сумкаңда бигрәк бардак икән бит», — ди Айдар һәм үз бардачогындагы бардактан битлек эзли башлый.
Блогерларның виртуаль дуслары да видеода «үзләрен таныган». «Кайбер вакытта һәрбер кесәдә, сумкада да битлек була. Икенче көнне берсе дә булмый», — дип комментарий калдырган инстачылар.