Җырчы Лилия Хәйруллина, 3 бала әнисе булуга карамастан, даими рәвештә спортзалга йөрергә вакыт таба. Ул социаль челтәрдәге сәхифәсендә спортзалда төшкән фотолар белән бүлеште.
«Мин кире әйләнеп кайта торган урын, бигрәк тә отпусктан соң. Минем тормышымның бер өлеше. Аерылгысыз өлеше.
Белмәүчеләр өчен, мин көн саен диярлек спортзалга йөрим. Әмма бу хакта аз күрсәтәм, аз язам. Күбрәк сторизларда күрсәтәм. Кемнеңдер ачуын чыгарадыр, кемгәдер – мотивация.
Өч декреттан соң шулай тонуста булырга тырышам. Бу – минем гадәтем, бәйлелек.
Күптән түгел тәмәке, электрон тәмәке, вейп тартуга багышланган тапшыруда булдым. Менә барыгызга да спорт белән шөгыльләнергә киңәш итәм. Ул стрессны яхшырак юкка чыгара, көч бирә, гел модада, трендта, сәламәтлек һәм буй-сын өчен файдалы. Начар гадәтләрегезне ташлагыз», – дип язган җырчы.
«Ниһаять, татар артистларыннан кем булса да спортны пропагандалый, ә порошок һәм коктейль түгел», – дип язучыга: «Монда бит эшләргә, шөгыльләнергә, начар гадәтләрдән арынырга кирәк. Һәр кешенең дә арт санын күтәрәсе килми», – дип җавап биргән спорт яратучы Лилия.
Фото: © Лилия Хәйруллинаның социаль челтәрдәге сәхифәсеннән