Көндәлек мәшәкатьләрдән арган өч бала әнисе Лилия каядыр очкан. Күрәсең, ял итәргәдер. Кайда икәнен ул әлегә сер итеп саклаган. Тик менә әлеге сәяхәте бик шома гына башланмаган шул җырчының. Беренчедән, кирәкле әйберләрен өендә онытып калдырган. Икенчедән, рейсны кичектергәннәр...
«Үзем дә «в шоке»!.. Каядыр очам... Мин моны мораль яктан аңлап бетерә, кабул итә алмыйм әле. Бейсболкамны, наушникларны онытып калдырганмын, бәлки, тагын нәрсәдер онытылгандыр. Аэропортта гына бер мең ике йөз сумга кытай наушниклары сатып алган идем – эшләми торган булып чыктылар. Кире бирдем, акчасын кайтардылар.
Самолётны ике сәгатькә тоткарладылар...
Гомумән, бүген көчкә җыенып чыктым, кыен, ияләнмәгән.
Хәерле юллар миңа.
Кая очам мин, нәрсәгә?» – дип сораган Лилия социаль челтәрдәге сәхифәсендә.
Җырчыны Төркиягә, Канадага оча дип фаразлаучылар булган. «Бәлки чыгыш ясарга очасыздыр», – дип уйлаган берәү.
«Лилия, кызым, исән-сау йөреп кайт. Юл фәрештәләре саклап йөрсен сине», – дип язган икенче берәү. Кая гына очса да, без дә Лилиягә уңышлы сәфәрләр телибез.
