Блогер Олеся Лесная һәм җырчы Лилия Хәйруллина белән уртак вайннар төшерүче популяр татар блогеры Илнар Идрисов никах укыткан. Ул сөйгәненә Гашыйклар көнендә, күзәтү тәгәрмәче кабинасында тәкъдим ясаган иде.
«Бүген безнең йөрәкләр мәңгегә кушылды», – дип яза ул социаль челтәрдәге сәхифәсендә.
Пост янындагы котлаулар да үзенчәлекле, шаян, блогерларныкыча. Интернет челтәрендә Илнар белән еш күренүче Олеся Лесная аңа: «Аңламадым. Ә мин?» – дип «үпкәләп» язып калдырган. Илнар белән Олесяның бергә төшергән вайнын истә тотып: «Ул сезгә йөзек бүләк иткән иде бит», – дигән комментарий да бар.
«Барлык әйткән сүзләремне кире алам», – дигән Илнар Олесяга.
Олеся аңа: «Җоннарың кире үсеп чыксын», – дип теләгән.
Шулай ук популяр блогер Илназ Кызык-Мызыкның да теләкләре күңелле:
«Ә хәзер запомни – шушы көннән башлап, хатын нәрсә әйтә, шуны гына эшлисе. Син уже пацан түгел, син – чүпрәк. Бәхетле булыгыз. 9 айдан бер генә түгел, ике кешенең капризын үтәргә насыйп булсын», – дип яза ул.