Кабаклы-алмалы-әфлисунлы эчлекле пирог өчен коры камыр әзерләргә кирәк. Бу рецепт белән Телеграм-каналында җырчы Лилия Муллагалиева уртаклаша.
Эчлек өчен 1400 грамм кабак, 300 грамм алма, 1 яки 2 әфлисун согы кирәк була. Кабакны һәм алманы угычтан уарга, әфлисунны икегә бүләргә, согын сыгарга.
Камыр өчен 1 стакан манный ярмасы, 1 стакан он, 0,5-1 стакан шикәр комы, 1 кап көпшәкләндергеч кирәк. Коры камыр килеп чыга.
Биек таба кирәк була, аны майларга, төбенә калынрак итеп коры камырны сибәргә, 1 кат эчлек салырга, аннары кабат – камыр. Шулай итеп, 3-4 кат ясарга. Иң өске катка – камырга – каткан 180 грамм атланмайны угычтан уарга.
Духовкада пешерергә, пирогны суынгач кисәргә киңәш ителә.
«Бик тәмле пирог була, рәхәтләнеп пешерегез», – дип белдергән җырчы.