Лилия Муллагалиева: «Кешелек дөньясында тагын бер әшәке чир барлыкка килде»
Җырчы үзенең авырып китүе турында хәбәр иткән иде. Ниһаять, терелеп, шәһәргә чыктым», — ди Лилия Муллагалиева. Ул үзе авырган чирнең барлык билгеләре коронавирус билгеләре белән туры килүен әйтә.
«Чирнең кайсын алсаң да жиңелләрдән түгел… Ә бу вирус бөтенләй дә кешенең яшәешен астын өскә китерә. Соңгы арада директта көн дә йөзләп, үзем кебек авырып терелгән яисә терелеп бетә алмый җәфаланган язылучыларым күп яза. Кайвакыт бөтен дөнья авырыйдыр кебек тоела. Кем белән сөйләшә башласаң да бер проблема — вирус. Минем үземнең тәгаен коронавирус булдымы, юкмы икәнен белмим. Чөнки антитәнчекләргә биргән анализ юк дип күрсәтте. Әмма ис, тәм югалту, тән авырту, йөткерү, температура 39га күтәрелү, тиз арада ике яклы пневмония барлыкка килү шул вирус булгандыр дигән фикергә этәрә. Бу ниндидер арттырып сөйләнә торган чир түгел. Ишетеп-күреп торасыз, авыр кичерүчеләр бик күп. Үлүчеләр дә шактый.
Иң мөһиме - паникага бирелмәскә, тиешле даруларны, витаминнарны эчеп, кешеләр белән очрашмаска тырышырга кирәк.
Үз-үзегезнең көчкә күбрәк ышаныгыз!
Тест уңай күрсәтәме, тискәреме, эш анда түгел. Беренче көннән үк антибиотиклар эчегез.
Кешелек дөньясының чирләр папкасында тагын бер әшәке чир пәйда булды. Сәламәт булыгыз, җаныкайларым. Бар да узгынчы булсын!» — дип язган җырчы инстаграмдагы аккаунтында.
«Антитәнчекләргә иртә биргәнсең. Ясалып өлгерми. Ирем терелгәннән соң бер айдан бирде, уңай күрсәтте»;
«Лилия, бик чыгып йөрмә, әле иң исерткеч халәттән арынгансың гына. Күзләрең дөньяга ачылган кебек булгандыр. Тирә-юньне күрә башлагансыңдыр. Ләкин йөрәгең йомшак булса — йөрәккә, яки бавыр, бөергә бәрергә мөмкин. Шуңа күрә саклан, тагын берәр атна ятыбрак тор»;
«Сиңа белгән, тәҗрибәле табиб күзәтүе кирәк. Мин үземнән чыгып әйтәм. Анализларымны ватсап аша җибәрәм, ул, шуның нигезендә, миңа дарулар билгели, көн дә шалтыратып, хәлне белешеп тора. Бу — бүгенге көн таләбе, хастаханәләргә йөрүдән Алла сакласын», — дип киңәшләр биргәннәр җырчыга инстадуслары.