Җырчы Лилия Муллагалиева белән Рифат Хөснияров яңа дуэт – «Югалма, табылма да» дип аталган яңа җыр тәкъдим иткәннәр.
«Рифат Хөснияров белән өр-яңа дуэт җырыбыз «Болгар» радиосында яңгырый башлады. Тиздән барлык музыкаль мәйданнарда ишетерсез!
«Югалма, табылма да». Гөлүсә Шаһбан сүзләренә язган җырым. Күңелләрегезгә хуш килсен!» – дип язган Лилия ханым социаль челтәрдәге сәхифәсендә.
Җырны «бик матур» дип бәяләгән җырчының виртуаль дуслары.
«Уңышлар, Лилия. Искиткеч бизәлеш һәм башкару. Музыкаль белгеч Закир Шаһбан күзлегеннән», – дип җылы комментарий калдырган җыр сүзләренең авторы, шагыйрә Гөлүсә Шаһбан да.
«Хөснияров белән якыннанрак таныштырыгыз әле» , – дигән берәү.
Рифат турында шуны гына әйтә алабыз. Ул моннан 3 ел элек үк, цирк бинасында Лилия Муллагалиева белән Айгөл Бариеваның уртак юбилей концертында чыгыш ясаган иде. Ул чагында ук аны: «Яшь, талантлы, моңлы, перспективалы, уңган-булган, танылып килүче егетебез...» – дип таныштырганнар иде. Рифат Хөснияровның социаль челтәрдәге аккаунтыннан күренгәнчә, ул «Я пою» дип аталган вокал мәктәбенә нигез салучы да икән әле.