Лилия Кадыровага Инстаграмдагы язылучысы күлмәк алып биргән
Күлмәкне Лилия башта үзе аласы булган, ләкин бәясе «тешләгән».
«Китап» радиосының башкарма продюсеры Лилия Кадыровага Инстаграмдагы язылучысы күлмәк алып биргән. Бу күлмәктән ул «Мин матурлык эзләп йөрим җирдән…» дигән әдәби-музыкаль кичәсендә чыгыш ясаган.
«Әдәби кичә алдыннан кибеттә күлмәкләр эзләп йөрдем. Озак йөри торгач, ап-ак, озын күлмәккә тап булдым. Шундый матур иде ул. Бик ошаттым. Шатлана гына башлагач, күпме торганын күрдем. Бәясе «тешли» торган булып чыкты. «Мин моны алмам инде, хет Инстаграмда истәлек булып калсын», — дип шушы 5 меңлек күлмәкне сториска керттем дә, алмыйча кайтып киттем.
Өйгә кайткач, бер язылучым: «Шундый матур күлмәк, сиңа бик килешә!» — дип язган. Мин: «Бәясе дә матур иде шул аның, алмадым», — дидем. Бу егет миннән бәясен сорады. Яздым инде. Кем белгән аның картама акча күчерәсен… Шулай итеп бу күлмәккә акчаны миңа инстадустым җибәрде. Әле дә ярый дөньяда шәп кешеләр бар. Рәхмәт аңа!» — дип безнең белән уртаклашты Лилия Кадырова.
