Лилия Биктимирова: «Әнием кулымда үлде»

«Яңа гасыр» телеканалында бара торган «Әй, язмыш, язмыш» тапшыруында кунакта Лилия Биктимирова булган иде. Каналының Instagram челтәрендә интервьюдан бер өзек урнаштырылган. Әлеге өзектә Лилия ханым әти-әнисе турында сөйли.

«Хәзер икесе дә мәрхүмнәр, аларны сөйләп утырмам инде. Әти әнигә китереп суккач, әни хастаханәгә эләкте. Миңа - 10, әнигә 35 яшь иде. Әни реанимациядә: „Лилия“, — дип үлде. Еламам, дигән идем… Оныта торган түгел. Әни үз кулларымда үлде», — дип сөйләгән җырчы.

Лилия Биктимированың әтисе моннан соң әле озак еллар яшәгән. «Әти картаеп үлде, дисәң дә була. Әти үзе дә фаҗигале үлде. Бумеранг дигән әйбер бар. Әмма мин аны бервакытта да калдырмадым. Эшли башлагач та акчалата ярдәм иттем. Бөтенләй гафу итеп тә булмый, әмма ул бит әти. Әни үлгәннән соң өч-дүрт ел аңа карата нәфрәтле идем. Аннан соң Фәдис аның янына алып барды. Моңа кадәр мин аңа читтән генә ярдәм итә идем», — ди ул.