Лениногорск башлыгы Рәгать Хөсәенов исеме каян алынганлыгын әйтте
Рәгать исеменең мәгънәсен башлыкка Кувейттан килгән дәрәжәле кунак аңлаткан.
Лениногорск башлыгы Рәгать Хөсәенов журналистлар белән очрашуда үз исеменең нәрсә аңлатуы турында сөйләгән.
«Бала вакытта Рәгать исеме кушканнарына үртәлә идем. Үсеп, аңлый башлагач, горурланырга тотындым. Чөнки гарәп халкында, без мөселманнарда ул бик сирәк, кадерле исем.
Мин туганда бабайга 90 яшь булган. Ул бик белемле, дини кеше иде. Бабай мин туганны көтеп алган һәм исемне дә үзе сайлап кушкан.
Дүрт ел элек кызык хәл булды. Безгә Кувейттан бер дәрәҗәле кунак килгән иде. Кабул итү бүлмәсенең ишегендә минем исемне укыган да, сәркатип кыздан: «Бу аның исемеме?» — дип, кат-кат сораган. Минем янга кергәч, Рәгать исеменең Кувейтта иң бай, мәртәбәле шейхларга гына кушылуын әйтте. Шуннан соң исемем белән тагын да горурлана башладым», — дигән Рәгать Хөсәенов.