Ләйсән Гыймаева «Татар җыры»нда булган көтелмәгән хәл турында: «Шок хәлендә калдым...»

Кичә «Татар җыры – 2022» концертында, Татарстан Республикасы Президенты указы белән, «Музыка сәнгатен үстерүгә өлеш кертүе өчен» җырчы Ләйсән Гыймаевага «Татарстанның атказанган артисты» дигән мактаулы исем бирелүе билгеле булды.

Бактың исә, бу шатлыклы вакыйга турында Ләйсән үзе бөтенләй хәбәрдар булмаган. Көтелмәгән куанычы белән җырчы социаль челтәрләрдә болай дип уртаклашкан.

«Котлаулар кабул итәм... «Татар җыры – 2022»... Дуэтыбызны (Ләйсән Гыймаева олы кызы Таңсылу белән дуэт башкарган. – авт.) яратып кабул иткәнегез өчен рәхмәт, тамашачыларыбыз! Хөрмәт итеп, бу зур мәртәбәле концертка чакыруыгыз өчен зур рәхмәт, оештыручылар – «Барс-Медиа» компаниясе!

Җыр тәмамлангач, Гөлназ Сәфәрова «Татарстанның атказанган артисты» дип игълан иткәч, шок хәлендә калдым... Чын... Исем бирелгәнен белмәдем. Булат (ире Булат Бәйрәмов. – авт.) ахырга чаклы миңа әйтмәгән... Булат Бәйрәмов, җаным, бәгърем, зур рәхмәт сиңа! Бу – безнең уртак җиңү», – дигән Ләйсән.

Җырчыга би-и-ик күп котлау сүзләре, җылы теләкләр килеп ирешкән. Виртуаль дуслары аңа бертавыштан: «Син бу исемгә лаек», «Куанычы булсын», «Исәнлектә тагын бик күп еллар иҗат итәргә язсын», – ише тәбрикләүләр җиткергән.

Бу теләкләргә «Интертат» редакциясе дә кушыла. Котлыйбыз, Ләйсән!