Башкортстан җырчылары Ләйлә һәм Рөстәм Галиевлар «алдавыч» видео төшергән. Видеоны караучылар иҗади гаиләне «бәби көтәләр», «малай алып кайталар» дип уйлаган.
Видеода күренгәнчә, Ләйлә кулын эченә куйган, аның кулын Рөстәм тоткан. Рөстәм акрын гына кулларын ала, ә анда хатыны тоткан телефонда – диңгез.
«Сезгә күптән әйтергә теләгән идек. Безнең күптән көтелгән отпуск башланды. Диңгез, кояш һәм ял», – дип дөресен әйтеп биргән җырчылар. Хәзер алар Төркиянең Анталия шәһәрендә ял итә.
Җырчыларны күп балалы итеп күрергә теләүчеләр өметләрен өзми, диңгездән бишәү булып кайтуларын теләп калганнар.
