Ландыш Нигъмәтҗанованың кызы Ләйлә әнисенә: «Синең балаларың күп, исемнәрен бутыйсың»
Җырчы Ландыш Нигъмәтҗанова балалары катнашындагы чираттагы кызыклы видеоны күрсәтте.
Видеода күренгәнчә, нәни Каюм шкафны бушатып уйнап йөри, ә артына «Каюм» дип язылган кәгазь ябыштырылып куелган.
«Кемнең эше бу?» – дип сорый җырчы. Ә кызы Ләйлә куркып тормый, «мин» дип җавап бирә.
«Ник, синең балаларың күп бит. Кайвакыт Каюмга да Ләйлә дип дәшәсең. Борылгач кына аңлыйсың, дүртенче балаң Каюм икәнен. Ләйлә бит гомумән малай була алмый, кыз ул», – дип җавап бирә тапкыр Ләйлә.
Җырчының сәхифәсен карап баручылар Фәрит Таишев белән Ландыш Нигъмәтҗанова балаларының матур итеп татарча сөйләшүенә, Ләйләнең тапкырлыгына соклануларын белдереп комментарийлар калдырган.