Кичә Столбище – Атабай автоюлында коточкыч авария булган. Салонында өч бала булган Ford Kuga автомобиле кюветка төшеп, басу буйлап 90 метр чамасы тәгәрәп барган. Бу хакта «Татар-информ» хәбәр итә.
Лаеш районы Дәүләт автоинспекциясе хәбәр иткәнчә, машинада 4, 7 һәм 9 яшьлек өч бала булган. Аларның берсе дә иминлек каешы белән эләктерелмәгән, автомобильдә балалар креслосы да булмаган.
Иң кечесе – ноябрьдә 5 яшь туларга тиеш малай – алгы пассажир утыргычында булган. Авария вакытында ул машина салоныннан очып чыккан.
Машина белән идарә иткән әтиләре һәм 2 бала хастаханәгә озатылган, диелә хәбәрдә.
