Ләйсән Таишевага: «Харап инде, сездә генә бала»
Ләйсән Таишева улы Роланны видеога төшереп, Инстаграмга урнаштырган. Видеода Ләйсән улына татар телендә сораулар бирә, транспорт төрләрен күрсәтергә куша, Ролан сөенеп күрсәтә.
«Улымның траспорт һәм йөк машиналарына булган мәхәббәтен сүз белән генә аңлатып бетереп булмый», — дип язган Ләйсән Таишева.
«Харап инде, сездә генә бала. Бездә бишәү, бер дә мактанмыйбыз», — дип ризасызлык белдергән бер ханым.
«Ошамаса — карамагыз», — дип җавап кайтарган аңа Ләйсән.
«Үзегезнең шәхси битегездә мактаныгыз», — дип язган башка инстачы.
«Бер Ләйсән генә күрсәтми бит, нигә аңа ярамый? Безгә бик ошый, бик сөйкемле, мәхәббәтле бала. Күз тимәсен. Әнисе матур итеп татарча сөйләшә. Афәрин, Ләйсән! Кемгә ошамый, үтеп китегез, мәҗбүри түгел», «Кешенен усаллыгына исең китәр. Ошамаса, карамаска кирәк, нигә бөтен дөньяга сибәргә әшәкелегеңне? Бик матур видео, әнисе саф татарча сөйли. Сау-сәламәт булсыннар балалар, куанышып яшәсеннәр», — дип яклаганнар Ләйсәнне.
Кечкенә Роланны яратып, транспорт министры һәм артистка тиңләүчеләр дә бар инстачылар арасында.