Ләйлә Дәүләтовага Татарстанның атказанган сәнгать эшлеклесе исеме бирелде
Шагыйрә котлаулар кабул итәргә әзер булуын да язган.
Ләйлә Дәүләтовага «Татарстанның атказанган сәнгать эшлеклесе» дигән мактаулы исем бирелде. Бу хакта шагыйрә инстаграмдагы сәхифәсендә хәбәр итә.
«Мин хәзер рәсми төстә Татарстанның атказанган сәнгать эшлеклесе булдым. Фәрит әфәнденең кулыннан бүләк алгач, сабый баладай сөендем. Хәзер өр-яңа көч белән яңа шигырьләр язарга, телетапшырулар эшләргә әзер.
Иҗатымны яраткан һәр татар кешесенә, бөтен татар дөньясын яктыртучы «Яңа гасыр» телерадиокомпаниясенә, Татар эстрадасының алтын баганасы булган «Салават» жыр театрына, минем җырларымны тамашачыга җиткерүче һәр артистка зур рәхмәтемне белдерәм.
Иң мөһиме, бөтен татар халкы исеменнән безне шундый матур, тыныч илдә яшәткәннәре өчен Татарстан җитәкчеләренә чын йөрәктән мең рәхмәт әйтәсем килә», — дип язган Ләйлә Дәүләтова.
Шагыйрә котлаулар кабул итәргә әзер булуын да искәрткән.
Шагыйрәне виртуаль дуслары дәрәҗәле исемгә лаек булуы белән котлаган. «Ләйлә котлыйм, ләкин татарча шрифт белән матур итеп язсагыз иде, сез бит иҗат кешесе», - дип комментарий да калдырган бер инстачы.