Ләйлә Дәүләтова Татарстанның атказанган сәнгать эшлеклесе исеменә лаек булды
Шагыйрә, «Адәм белән Һава» тапшыруының авторы һәм алып баручысы булып танылган Ләйлә Дәүләтова Татарстанның атказанган сәнгать эшлеклесе дигән мактаулы исемгә лаек булган. Бу хакта ул Инстаграм битендә хәбәр итә.
«Изге Җомга кичендә Сезнең белән шатлыгымны уртаклашам, Дусларым! Татарстан Президенты Указы белән миңа «Татарстанның атказанган сәнгать эшлеклесе» дигән дәрәҗәле исем бирелде.
Президент Указын бүген миңа илледән артык кеше җибәрде! Шулкадәр кешенең минем өчен шатлануын күреп, мин дә шатландым. Башкаларның куанычына сөенә белү — һәркемнең дә кулыннан килми.
Изге теләкләрегез һәм иҗатытымны яратуыгыз өчен, Аллаһның рәхмәте яусын Сезгә, Дусларым! Ничек уйлыйсыз, мин моңа лаектыр бит? Котлаулар һәм лайклар кабул итәм», — дип язган Ләйлә Дәүләтова.
Инстадуслары Ләйлә Дәүләтованы матур сүзләр белән куандырган: «Син моңа лаек, иҗатта уңышлар, сәламәтлек телим!», «Яңадан-яңа үрләр, дәрәҗәле исемнәр өстәлә торсын, соңгысы булмасын», «Чын күңелдән котлыйбыз!» — дип язганнар.